БИШКЕК, 23-май — Sputnik. Бишкектин чок ортосунда жайгашкан мурдагы "Нарын" ресторанынын имаратын түрттүрүү пландалып жатат. Бул тууралуу Sputnik Кыргызстан агенттигинин кабарчысына Свердлов райондук администрация башчысы Самарбек Болотбеков билдирди.
Анын айтымында, бул туурасында акимиатка имараттын ээлери кабарлаган. Буга чейин райондук администрация бул жайда адам өмүрүнө жана ден-соолугуна коркунуч туудурган окуялар көп болгондуктан айланасын тосууну буйруган.
"Өспүрүм балдар имараттын чатырына чыгып алышкан. Кокустан жыгылып жараат алса эмне болмок? Бул жерде өрт кырсыгы да катталган. Мындай көрүнүштөргө бөгөт коюу максатында биз имараттын айланасын толугу менен тосууну буйруганбыз", — деди Болотбеков.
Мэриянын маалымат кызматынан билдиришкендей, азырынча Бишкек башкы архитектурага эски ресторандын ордуна эмне салынары боюнча арыз жана жаңы имараттын эскиздери түшө элек.
Буга чейин Улуу Ата Мекендик согуштун ардагерлери Фрунзе жана Шопоков көчөлөрүнүн кесилишинде каралбай калган имаратты эмгек жана согуш шаймандарынын музейи кылууну сунушташкан.
"Нарын" рестораны 1980-жылдары популярдуу болгон. Бирок андан бери имараттын ээнсиреп турганына 10 жыл болду.
