БИШКЕК, 17-май — Sputnik. Оштогу аттракциондон жабыркагандардын абалы туруктуу экендигин Саламаттык сактоо министрлигинен кабарлашты.
Жекшемби күнү саат 17.30дарда Алишер Навои атындагы сейил бактагы карусель адамдары менен кошо кулаган. Шаардык оорукананын маалыматына караганда, жабыркаган 11 адамдын үчөө — балдар. Окуя боюнча кылмыш иши козголгон.
Саламаттык сактоо министрлиги ооруканада үч адам калганын маалымдады.
Билдирүүгө караганда, 37 жаштагы аялдын баш сөөгү жабыркап, чекеси жарылган. Ошондой эле колу менен буттары тытылган. Ал эми 18 жаштагы кыз омурткасын кокустатып алса, 22 жаштагы жарандын баш мээси жабыркап, бетинин оң тарабы көгөрүп калган.
Шаршемби күнү ооруканага дагы бир 11 жаштагы кыз алынып келинген. Анын чыканактары менен тизелери сыйрылып кеткен. Жабырлануучуну дарыгерлер карап, үйүнө кое беришкен.
