БИШКЕК, 16-май — Sputnik. Бишкекте таштандыны чар-жайыт ыргытып, өрттөгөндөр административдик жоопко тартылат. Бул тууралуу шаардык мэриянын маалымат кызматы билдирди.
Учурда бул боюнча 16 инспектор күнү-түнү дем алышсыз иштеп жатат.
"Таштанды өрттөө фактылары көбүнчө жер үйлөрдө жана өндүрүштүк мекемелерде кездешет. Өткөн жылы ушул багытта 50 мыйзам бузуу катталган. Таштанды калдыктарын өрттөөдө ис эле эмес, уулуу заттар да чыгып, андагы химиялык заттар адам саламаттыгына залал келтирет", — деп айтылат маалыматта.
Атайын бөлүнбөгөн жайларга таштанды таштагандар административдик жоопко тартылып 2000 сом өлчөмүндө айып пул же сегиз сааттык коомдук жумушка кесилет. Ал эми өндүрүштөн чыккан таштандыларды өрттөп же туура эмес жерлерге ыргыткандар 10 миң сом айып төлөп же сегиз саатка коомдук жумушка тартылат. Эгер бул көрүнүш дагы кайталана турган болсо эки эселеп айыпка жыгылары маалымдалды.
