БИШКЕК, 15-май. — Sputnik. Дубайда өткөн Queen of USSR Dubai — 2017 эл аралык сулуулук сынагына Кыргызстандын атынан катышкан украиналык Алиса Саросек баш байгени жеңип алды. Бул тууралуу Sputnik Кыргызстан агенттигине сынактын уюштуруучусу Ольга Пищикова маалымдады.
Аталган сынакка жалпы 17 бийкеч ат салышкан. Анда Дубайда жашаган кыздардын көпчүлүгү мурунку СССРдин курамындагы өлкөлөрдүн атынан катышкан. Бардык добуштардын жыйынтыгы менен Алиса биринчи орунга жетишип "СССР ханышасы" титулуна ээ болду. Ал эми экинчи орунду Түркмөнстандын чүрөгү, үчүнчүнү Казакстандын атынан чыккан сулуулар багындырган.
"Финалда Алиса Кыргызстан жана кыргыз маданиятын эмирликтин маданиятын айкалыштыруу менен чагылдырып берди. Кыргыз көйнөгүн кийип чыгып улуттук музыкага бийлеп көрүүчүлөрдү таң калтырды. Бийдин сюжетинде Дубайдан жергиликтүү арабды жолуктуруп аны сүйүп калган окуя камтылып, арабдардын салттык бийин да аткарып берди. Бул анын сынактан жеңип чыгуусуна чоң шарт түздү", — деди Ольша Пищикова.
Украиналык сулуу жөн жерден Кыргызстандын атынан катышып жаткан жок. Анын чоң энеси Кыргызстанда төрөлгөн. Алиса сынакка катышуу менен чоң тайлары жашаган өлкөгө жакыныраак болууну көздөгөн.
Украиналык сулуу Одесса шаарынан болот. Учурда Дубайда жашап, бренддик компаниялардын биринде иштейт. 2011-жылы ал Miss Ukraine South сулуулук конкурсунун финалына чейин барган.
