БИШКЕК, 10-май — Sputnik. Санкт-Петербургдун Невский районунда 8-майда жоголуп кеткен 10 жаштагы бала изделип жатканын Федералдык маалымат агенттиги укук коргоо органдарына таянуу менен билдирди.
Ага ылайык, полицияга баласы жоголуп кеткени боюнча Кыргызстандын жараны кайрылган.
"8-майда Тельман көчөсүндөгү үйлөрдүн биринен кичинекей бала чыгып кеткен боюнча кайтып келген эмес. Ал жылуу көк түстөгү күрмө, бутуна кара-ак болгон кроссовка кийип жүргөн. Жанында уюлдук телефон, документ жана акча болгон эмес", — деп баланын атасы айтып берген.
Жоголуп кеткен бала шаардагы мектептердин биринде 3-класста окучу. Буга чейин өз алдынча үйдөн чыгып кеткен эмес.
Невский районунун полициясы издөө иштерин жүргүзүп жатат.
