БИШКЕК, 10-май – Sputnik. "Аялга кирип кеткен жин-шайтанды кууйм" деп аны тирүүлөй өрттөп жиберген никарагуалык пастор Хуан Грегорио Роча Ромеро түрмөгө отурду. Бул туурасында РИА Новости жазды.
Аны менен кошо дагы үч шериги 36 жыл абакка кесилди.
Төбө чачты тик тургузган бул окуя февраль айында Никарагуанын Кортесаль аймагында болгон. 25 жаштагы аялды пастор баш болгон адамдар уурдап, өрттөп жиберишкен. Жергиликтүү эл аялды денесинин 80 пайызы күйүп калгандан кийин табышкан, бирок ал дем алып жатканы байкалган. Дарыгерлер анын өмүрүн сактап калууга аракет кылганы менен майнап чыккан эмес.
Жазыксыз аялды өрттөөгө үч эркектен сырткары дагы бир аял катышып, сот аны 30 жыл түрмөгө кескен өкүм чыгарган.
