БИШКЕК, 29-апр. — Sputnik. Өлкө башчысы Алмазбек Атамбаев адам өмүрүн алган Өзгөндөгү жер көчкү боюнча элге кайрылды. Бул тууралуу президенттин маалымат кызматы билдирди.
Атамбаев өз сөзүндө ал деле айылда чоңойгонун айтып, көчкүсү келбеген элди түшүнөрүн айтты.
"Жазында даяр жайыт турат, көчкүсү келбейт. Бирок, макул сен үйдүн кожоюну көчкүң келбесе, балдардын эмне убалы бар? Малдын башы балдардын башынан артыкпы? Малдын жаны баланын жанынан артыкпы? Ошол балдар аман калса, малын да сатып берет. Ишкер болот. Мүмкүн президент болмок", — деди өлкө башчы.
Ал ошондой эле элге кайрылып, малдын жанын, дүнүйөнү баладан өйдө койбоого чакырды.
Эске сала кетсек, 29-апрелде таңкы саат 06:40та көлөмү 1 миллион кубометр болгон жер көчкү жүрүп, турак жайды жашоочулары менен кошо басып калган. Алдын ала маалыматтар боюнча жер көчкүнүн алдында 24 киши калган, арасында балдар дагы бар.
