БИШКЕК, 29-апр. — Sputnik. Борбор калаада Тез жардам унаасы жол кырсыгына кабылды. Бул тууралуу Кайгуул милициясынан билдиришти.
Маалыматка ылайык, жол кырсыгы 28-апрель күнү Бөкөнбаев көчөсү менен Жаш Гвардия бульварынын кесилишинде болгон.
"Тез жардам Республикалык кан борборунан экинчи төрөт үйүнө кан алып бараткан. Бөкөнбаев көчөсүнө бурулуп жатканда жеңил унаа келип сүзүп, окуя болгон жерден из жашыргын", — деп жазылат маалыматта.
Жол эрежесин бузган унаанын мамлекеттик номери окуя болгон жерге түшүп калган. Анын жардамы менен унаа кимге катталганы аныкталып, айдоочу изделүүдө.
Кырсыктан Тез жардам машинасынын айдоочусу жаракат алып, калаадагы Травмотология жана ортопедия илим изилдөө борборуна жаткырылды.
