Өзгөн районунун Аюу-Сай айылына түшкөн көчкү жалпысынан 11 үйдү басып калганын ӨКМдин маалымат кызматынын өкүлү Авазбек Айтиев Sputnik Кыргызстан агенттигине билдирди.
Анын айтымында, кырсык 11 үйдү тооруган. Көчкү басып калган үйлөрдүн төртөөсүндө эч ким жашаган эмес.
"Калган жети үйдө 24 киши жашайт эле деп айыл тургундары менен айыл башчылары айтып жатат. Азыр издеп куткаруу иштерине 175 куткаруучу тартылган. Алар көчкү баскан үйлөрдүн болжолдуу орундарын казып жатат. Азырынча эч ким табыла элек", — деди Айтиев.
Ал Генералдык штабдан дагы 100 куткаруучу жардам берүүгө келе жаткандыгын кошумчалады.
Учурда жер көчкү түшкөн аймакта Жарандык коргоонун штабы түзүлүп, иштеп жатат.
Эске сала кетсек, 29-апрелде таңкы саат 06:40та көлөмү 1 миллион кубометр болгон жер көчкү жүрүп, болжол менен 24 кишини басып калган.
