БИШКЕК, 23-апр. — Sputnik. Киши колдуу болгон милициянын подполковнигинин өлүмүнө шектелгендер тергөөгө ишенбестик көрсөтүп, ишти УКМКга өткөрүү боюнча Башкы прокуратурага кайрылышты. Бул тууралуу шектүүлөрдүн жактоочусу Айсалкын Карабаева аймактык кабарчыга билдирди.
Эске сала кетсек, 23-март күнү Ош шаарында Учар айылынын Набережная көчөсүндө өзүнө таандык унаадан милициянын подполковниги Таирбек Уларовдун сөөгү табылган.
"Шектүү катары кармалган менин жактоомдогу Наргиза Ражапова анын иниси Мурат Ражапов жана күйөөсү Дамир Шабыралиев милиция кызматкерлери тарабынан кыйноого алынган. Анын кесепетинен Наргиза Ражапованын 1,5 айлык эгиз балдары боюнан түшүп калган. Ага далил катары бардык тиешелүү медициналык документтер бар. Милиция кызматкерлеринин үстүнөн доо арызы менен Ош шаардык прокуратурасына кайрылдык", — деди Карабаева.
Жактоочу шектүүлөрдүн күнөөсү жок экенин айтып, иш адилет тергелбей жатат деген жүйөө менен Башкы прокуратурага кайрылышканын кошумчалады.
