БИШКЕК, 22-апр. — Sputnik. Жекшемби күнү көпчүлүк аймактарда өткүн өтүп, күн күркүрөйт. Ош жана Бишкек калааларында күндүн табы 20 градустан өйдө болот. Бул тууралуу Кыргызгидрометтен билдиришти.
Маалыматка ылайык, бийик тоолуу райондордо кар, кээ бир райондордо жаан-чачын катуу жаайт.
"Ош жана Бишкек шаарларында күн 21-23 градуска чейин жылыйт", — деп жазылат маалыматта.
Бийик тоолуу аймактарда жолдор тайгак болуп, кар күрткү жаралышы күтүлөт. Батыштан соккон шамалдын ылдамдыгы секундасына 4-9 метрге, айрым жерлерде 15-20 метрге чейин жетет.
