БИШКЕК, 20-апр. — Sputnik. Юлиус Фучик атындагы сейил бак жана Жаш Гвардия бульвары толугу менен оңдолорун Sputnik Кыргызстан маалымат агенттигинин мультимедиалык маалымат борборунда өткөн жыйын учурунда Бишкектин Ленин районунун акими Нурдин Тынаев билдирди.
Анын айтымына караганда, сейил бактагы тротуарлар толугу менен жаңыртылып, балдар аянтчасы, чоңдор үчүн эс алуу зонасы жайгаштырылат. Ошондой эле жаңы отургучтар менен клумбалар пайда болот. Сейил бактын аймагындагы спорттук аянтча калыбына келтирилип, эки коомдук ажаткана менен сейил бакты көзөмөлдөөчү администрациянын имараты жайгашат.
"Буга чейин сейил бакта кинотеатр иштеп келген. Бирок ал мыйзамсыз түрдө жеке менчикке берилип кеткен. Эми кинотеатрды сот аркылуу муниципалдык менчикке өткөрүүнү пландап жатабыз. Ал жерге бий аянтчасы курулушу мүмкүн", — деди аким.
