БИШКЕК, 5-апр. — Sputnik. Түштүк Кореянын 9-майга белгиленген президенттик шайлоодо эл беш талапкердин ичинен бирөөнө добуш берет. Бул тууралуу YTN телеканалы кабарлады.
Рейтингде көрсөтүлгөндөй, учурда ири оппозициялык демократиялык партиянын өкүлү Мун Чжэ Ин 30 пайыз добуш менен алдыңкы катарда келе жатат. Ал эми "Элдик партиядан" көрсөтүлгөн Ан Чхоль Су 20 пайыз добуш топтоп экинчи сапта.
Рёнхап агенттигинин маалыматына ылайык, ушул эки саясатчы былтыртан баштап 2012-жылкы шайлоодо жеңишке ээ болгон Пак Кын Хеге каршы турушкан.
"Эркин Корея партиясы" президенттикке Кёнсан-Намдо облусунун губернатору Хон Чжун Пхёну көрсөтсө, ал эми "Акыйкат саясий партиясы" өз тарабынан өлкөнү башкарууга Ю Сон Минди сунуштаган.
Корея Республикасында президенттик шайлоонун убагынан эрте өтүп жатышы мурунку президент Пак Кын Хенин бийликтен кетип, камакка алынышы менен байланыштуу.
Кореянын тарыхында Пак Кын Хе импичменттин айынан президенттиктен кол жууган алгачкы президент. Ал мамлекеттин ишине досу Цой Сун Силди аралаштырган деп айыпталган. Цой Сун Кореядагы ири компаниялардан пара алганы айтылууда.
