БИШКЕК, 5-апр. — Sputnik. Ат-Башы районундагы Терек-Суу айылынын тургундары суу каптоонун алдын алуу максатында жогору жакта жайгашкан каналдын жээгине тосмо коюп чыгышты. Бул тууралуу Sputnik Кыргызтан агенттигине айылдагы "Чеч-Дөбө" жаштар уюмунун төрагасы Апсат Эсенбаев билдирди.
Анын айтымында, айыл чуңкур жерде жайгашкандыктан, жаз алды менен эриген кар жана тоодон агып келген суу каналдын тешиктеринен өтүп кыштакты каптап кетет.
"Быйыл кар өзгөчө көп жаагандыктан, аймакта өзгөчө кырдаал абалы түзүлгөнүн жакшы билесиздер. Кар азыр да калың эле. Демек суу жылдагыдан көбүрөөк болот. Суу каптоонун алдын алып, мүшөктөргө кум менен топурак шыкадык дагы каналдын жээгине төшөп чыктык", — деди Эсенбаев.
Активисттин айтымында, буга чейин айыл жаштары кары-картаң, багар көрөрү жок адамдардын жана жалгыз бой энелер жашаган үйлөрдүн тегерегиндеги карларды күрөп беришкен.
