БИШКЕК, 31-мар. — Sputnik. Чүй облусунда сейрек кездешүүчү эки аюунун териси табылгандыгы тууралуу "Барс" браконьерликке каршы тобунун (NABU уюмуна караштуу) маалымат катчысы Зарина Эсенбаева билдирди.
Анын айтымында, рейддер Бүткүл дүйнөлүк ак илбирсти коргоо форумуна карата өткөрүлүүдө.
"Жаратылыш ресурстарын рационалдуу колдонуу департаменти, "Барс" тобу жана Чүй ИИБдин кызматкерлери сейрек кездешүүчү аюулардын терисин сатып жаткан Чүй тургунун колго түшүрдү", — деди Эсенбаева.
Тянь-Шань күрөң аюусу Советтер Союзунун кызыл китебине 1978-жылы киргизилген. Азыр анын саны 100гө жетпегендиктен Кыргызстандын Кызыл китебине да катталган. Аны кармоого, сатууга, терисин үйүндө сактоого мыйзам жол бербейт.
Мыйзам боюнча күрөң аюуну аткандар 400 миң сом айып төлөйт.
