БИШКЕК, 30-мар. — Sputnik. Өкмөттүн жемкорлук менен күрөшүү планы жыйынтык бербей жатат. Мындай пикирин Саламаттык сактоо министрлигинин алдындагы коомдук байкоочу кеңештин жетекчиси Айбар Султангазиев Sputnik Кыргызстан агенттигинин мультимедиалык маалымат борборунда болгон жыйында билдирди.
Мамлекеттик органдардын алдындагы коомдук байкоочу кеңештер 2014-жылы түзүлгөн.
Өкмөттүн жемкорлук менен күрөшүү планы 2015-жылы бекитилип, коррупциянын алдын алууга багытталган.
"Ооруканага келген бейтап коррупциянын деңгээли азайганын сезеби деп дайыма суроо берем. Өкмөттүн жемкорлукка каршы күрөшүү планынын 70 пайыз пункту аткарылды. Аны адамдар сезип жатабы? Менин баамымда бул план абдан жакшы, бирок тажрыйба жүзүндө эч нерсе өзгөргөн жок. Коррупция үчүн кимдир-бирөө жоопко тартылыш керек, бирок андай нерселер өтө сейрек кездешет", — деди Султангазиев.
Ал ошондой эле Саламаттык сактоо министрлигинин алдындагы коомдук байкоочу кеңеши коррупция менен күрөшүү үчүн жаңы план иштеп чыкканын, бирок ал ишке ашырыла электигин кошумчалады.
