БИШКЕК, 29-мар. — Sputnik. Президент Алмазбек Атамбаев ички иштер министри Улан Исраиловду кабыл алды. Бул тууралуу өлкө башчынын маалымат кызматы билдирди.
Жолугушууда мамлекет башчысы реформалоонун алкагында ички иштер органдарынын ишинин натыйжалуулугун жогорулатуу боюнча көрүлүп жаткан иштер тууралуу маалымат алды. Исраилов ошондой эле президентке жакында өтө турган эл аралык иш-чаралар учурунда коопсуздукту камсыз кылууга милициянын даярдыгы тууралуу айтты.
Акыркы учурда ар кандай саясий акциялардын өтүп жатканын айткан президент милиция адамдардын жарандык позициясын билдирүүгө укугун сыйлоо зарылдыгын, бирок мыйзам бузулган учурда коомдук тартипти сактоо боюнча өз милдетин так аткарышы керек экенин баса белгиледи.
