БИШКЕК, 25-мар. — Sputnik. Садыр Жапаровду колдоп чыккандарга карата милиция эскертүүчү желим ок чыгарды. Бул тууралуу өздүк кабарчы жеринен билдирди.
Эске сала кетсек, УКМК Садыр Жапаровду келээри менен камакка алды. Ал эми анын тарапташтары УКМК алдында митингге чыгышкан.
"Митингге чыккандар менен милиция кызматкерлери ортосунда тирешүү болуп, күч органдары эскертүү иретинде желим ок чыгарды", — деди кабарчы.
Ал милиция бир канча адамды кармап кеткенин кошумчалады.
Белгилей кетсек, Жапаровду бүгүн түшкө маал кыргыз-казак чек арасынан УКМКнын кызматкерлери кармап, Улуттук коопсуздук мамлекеттик комитетине алып келген. Аны чек арадан тособуз деп барган тарапташтары шаарга келип, Горький атындагы паркта митинг кылып, андан соң УКМК имаратынын алдына келишкен.
Экс-депутат Кылмыш жаза кодексинин барымтага алуу, бийлик өкүлүнө карата зомбулук көрсөтүү, өлтүрөм деп коркутуу, бейбаштык беренелери боюнча айыпталууда.
УКМКнын берген маалыматына ылайык, Садыр Жапаров 2013-жылы 7-октябрда Каракол шаарында болгон нааразычылык акциясы учурунда Эмил Каптагаевди барымтага алгандарга телефон аркылуу буйрутма берип турганы тергөө учурунда аныкталган.
Каптагаевди барымтага алган унаа Жапаровдун тууганы Куланбаевге таандык болгон.
"Күбөлөрдүн көрсөтмөсүнө жана кылмыш ишиндеги документтерге ылайык, 7-октябрда уюштурулган митинг бийликти басып алып, Ысык-Көл облусундагы абалды туруксуздаштырууга багытталган", — деп билдирет УКМК.
Мындан сырткары, Жапаров аталган митингди каржылаган деп айыпталууда.
