БИШКЕК, 23-мар. — Sputnik. Борбор калаада каракчылыкка шектелип жаш балдар кармалды. Бул тууралуу ИИМ сайтында жазылган.
Маалыматка ылайык, кармалган адамдар бир күндө эки адамды тоноого аракет кылышкан.
"5-март күнү болжол менен таңкы саат 06:40 чамасында эки белгисиз азиат улутундагы адамдар май куюучу жайынжа иштеген 30 жаштагы аялга тапанча такап, кире бериш эшиктин терезесин талкалап кирүүгө аракет кылышкан. Бирок өтө албай, ал жерден изин суутуп "Mazda 626" үлгүсүндөгү унаа менен качып кетишкен", — деп жазылат маалыматта.
Аталган факт боюнча Ленин районунун ИИБинин тергөө бөлүмү Кылмыш Кодексинин 168-беренеси (каракчылык) боюнча кылмыш ишин козгойт.
Ошол эле күнү Ленин райондук ИИБине 43 жаштагы эркек адам кайрылып, анын уюлдук телефонун жана "Mazda 626" үлгүсүндөгү унаасын тартып алганын айтып арыз жазган.
Бишкек ШИИБинин кызматкерлеринин ыкчам иликтөөсүнүн жыйынтыгында Чүй облусунун 19 жаштагы тургуну жана жалал-абаддык 20 жаштагы бала кармалган. Экөө тең Бишкек шаарында жашай турганы аныкталды.
Кармалгандардын биринин жашаган жерин тинтүү учурунда үйүнөн эки беткап жана бычактар табылган.
Учурда шектүү жарандар убактылуу кармоочу жайына киргизилди.
