БИШКЕК, 21-мар. — Sputnik. Ошто диний кызматкерлерге 18-мартта башталган "Чечендик өнөрдү өнүктүрүү" аталышындагы семинар 18-апрелге чейин уланаарын Ош облусунун мусулмандар казыятынын маалымат кызматы Sputnik Кыргызстан агенттигине кабарлады.
Аталган окуу "Чечендик өнөр" мектебинин Оштогу бөлүмү тарабынан өткөрүлүүдө.
"Семинарда дин өкүлдөрүнө "Эл алдына чыгып сүйлөөдөгү коркунуч, сүрдөө жана толкундоону жоготуу" темасы боюнча окутуу жүргүзүлүүдө. Так жана маданияттуу сүйлөө жолдору, кыймыл-аракеттерди туура пайдалануу, көпчүлүктүн алдында сүйлөөнү иштеп чыгуу жана үндү туура коюу ыкмасы жөнүндө алгачкы түшүнүктөр берилет", — деп айтылат билдирүүдө.
Ошондой эле казыят жамааты риторика курсуна облустагы мечит имамдарын да катыштыруу зарыл экендигин белгиледи.
