БИШКЕК, 16-мар. — Sputnik. Үч баласы менен жалгыз калган энеге кайрымдуулуктан чогулган каражатка Чүй облусунун Степное айылында алты бөлмөлүү үй курулууда. Бул туурасында "Кайрымдуу бол" коомдук кайрымдуулук фондунун жетекчиси Азамат Байматов билдирди.
Эскерте кетсек, өткөн жылы жаш балдары менен баш калкалай турган үйү жок, ар кайсы аймакта ижарага батир алып күн кечирген 32 жаштагы Айжамал Мамырова коомчулуктан жардам сурап кайрылган.
"Айжамалдын жолдошу каза болгондон кийин кайын журту батырбай кетирип жиберген экен. Апасынын да жашоо-шарты начар болгондуктан ага жүк болбоюн деп өз арабасын өзү тартып жүргөн. Биз бул тууралуу уккандан кийин кайрымдуулук иш-чараларын баштаганбыз. Каражаттын басымдуу бөлүгү Россия, Корея, Италия өңдүү чет өлкөлөрдө иштеген мекендештерден келип жатты", — деди Байматов
Ошондой эле ал былтыртан бери аталган фонд чогулган каражаттын эсебинен жалгыз бой аялдын турак-жайына болгон ижара акысын төлөп, азык-түлүк менен камсыздап турганын билдирди.
Учурда Айжамал Мамыров балдары менен жаңы курулуп жаткан үйүнүн жанында темир вагондо жашап жатат.
"Кышта Ак-Жол айылында батирде жашадык. Ал үйдүн ижара мөөнөтү бүткөндөн кийин март айынын башында бул жакка көчүп келдик. Бул айылдан арзаныраак батир табылбагандыктан, темир вагон алып келип беришкен. Улуу балам сегиз жашта, кийинки кыздарымдын бири бешке, кичүүсү үчкө чыгып калды. Алар да үйлүү болот экенбиз деп сүйүнүп отурушат", — деди кубанган эне.
Ал ошондой эле жардам көрсөтүп жаткандарга терең ыраазычылык билдирди.
