БИШКЕК, 16-мар. — Sputnik. Бишкек шаарынын мэриясы калаа башчысы Албек Ибраимовдун "Жарайт Сити" долбоору аркылуу калаа тургундарын ишембиликке чакырган ролигин жарыялады.
"Жарайт Сити" — шаарда болуп жаткан окуяларды тамашага салып баяндаган скетч-шоу.
Эскерте кетсек, 18-марттан 22-апрелге чейин борбордо ишембилик өткөрүлөт. Ал эми бул ролик бардык калаа тургундарын коомдук пайдалуу эмгекке чакыруу максатында тартылган.
Сюжет боюнча "Жарайт Сити" шоусунун резиденти Нурсултан Курсанали уулу шаар мэринин ордуна бардык шаардыктарды ишембиликке чакрып жаткан маалда сырттан Албек Ибраимов келип калат. Тамашачы калаа башчысына орун бошотуп берип, андан соң Ибраимов тургундарга өзү кайрылуу жасайт.
Бул видео менен вице-мэр Эркинбек Исаков жана Свердлов райондук администрациясынын баракчасы да бөлүшкөн.
Ишембилик борбор калааны көрктөндүрүү жана тазалоо максатында уюштурулган. Анда шаардык парктар, аянттар, менчик жана мамлекеттик имараттардын алды тазаланат.
