БИШКЕК, 15-мар. — Sputnik. Прокуратуранын текшерүүсүнөн кийин видеобайкоо системасы Ош аэропортунун учуп-конуу тилкесине да коюлганын Sputnik Кыргызстан агенттигине Жарандык авиация агенттигинин маалымат кызматы билдирди.
Кечээ, 14-март күнү Башкы прокуратура текшерүүнүн жыйынтыгы менен "Манас" аба майданынын аэродромуна видеокамералар орнотулгандыгы тууралуу маалымат тараткан. Текшерүү өлкөдөгү бир дагы аэродром учактардын учуп чыгуусу менен учуп келишин көзөмөлдөбөй турганы анык болгон.
"Калган аэродромдордо учуулардын саны аз болгондуктан, видеобайкоо системасын орнотуу карала элек. Ушу тапта Жарандык авиация агенттиги видеобайкоо орнотууну милдеттүү талап катары киргизүү маселесин иштеп чыгууда", — деп айтылат маалымат кызматтын билдирүүсүндө.
Транспорт прокуратурасы учурда текшерүүсүн улантып жатат.
Видеобайкоо системасы аркылуу кырсыктын келип чыгуу себептерин аныктаса болот. Көпчүлүк учурда авариялык абалдар тилкеге конгондо же андан учканда катталат.
