БИШКЕК, 14-мар. — Sputnik. Көз карандысыз мамлекеттер шериктештигинин (КМШ) рыногуна Кыргызстандын айыл чарба продукцияларына болгон талап жогорулап жаткандыгын экономика илиминин доктору Жумакадыр Акенеев Sputnik Кыргызстан агенттигинин мультимедиалык маалымат борборунда өткөн "КМШ өлкөлөрүнүн экономикалык күн тартиби" аталышындагы видео байланыш учурунда билдирди.
17-мартта Москва шаарында КМШ өлкөлөрүнүн Экономикалык кеңешинин 73-жыйыны өткөнү жатат. Анда КМШнын радионавигациялык программалары талкууланат.
Акенеевдин айтымында, Кыргызстан жыйындан кийин аткарылчу иштерге өз салымын кошо алат.
"Дүйнөлүк аренада "жашыл экономиканы" өнүктүрүү маселеси турат. Буга байланыштуу Кыргызстан экологиялык жактан таза продукцияларды өндүрүүгө басым жасоодо. Өлкөнүн айыл чарба продукциясына болгон талап чет өлкөдө өсүп жатат", — деди Акенеев.
Ал ошондой эле Кыргызстанда 46 күнөскана курулуп жатканын белгилеп, КМШ өлкөлөрүнүн рыногу кыргыз продукциясына муктаж экенин кошумчалады.
