БИШКЕК, 13-мар. — Sputnik. Бишкектин бир катар бөлүктөрүндө 14-март күнү муздак суу убактылуу берилбей турганын мэриянын маалымат кызматынан кабарлашты.
Билдирмеге караганда, эртең саат 9.00дөн 17.00гө чейин Калык Акиев, Күрөңкеев, Логвиненко, Панфилов, Абдрахманов, Абдумомунов көчөлөрү менен Чүй жана Жибек Жолу проспектилеринде суу берүү токтотулат.
Шаардык кызматтардан кабарлашкандай, муздак суунун токтошу оңдоо иштерине байланыштуу.
Муздак суу Токтогул Сатылганов атындагы улуттук филармония, Спорт ордосу, шаардык №3 гинекология, Улуттук статистикалык комитет, Кыргыз улуттук университети, Дөлөн Өмүрзаков атындагы стадион, Санитардык эпидемиологиялык көзөмөл департаменти, Кыргыз драма театры, Улуттук китепкана, Биринчи Май райондук администрациясы, Президенттин алдындагы мамлекеттик академия жана башка объектилерде убактылуу токтотулат.
