БИШКЕК, 13-мар. — Sputnik. Борбор калаадагы №47 түзөтүү колониясынын кызматкерлери диний экстремизм боюнча соттолгон абактагы кишиге сырттан берилген буюм-тайымдарды карап жатып, шампундун бөтөлкөсүнө салынган уюлдук телефонду таап чыгышкан. Бул туурасында Жаза аткаруу мамлекеттик комитетинин маалымат кызматы (ЖАМК) билдирди.
Бөтөлкөнүн ичинде телефон менен бирге анын заряддагычы да болгон.
"Түрмө ичине алып кирүүгө тыюу салынган буюмдарды шампундун бөтөлкөсүнө кантип батырышканын элестетүү кыйын. Бирок мекеменин кызматкерлери кыраакылык кылып, мыйзамсыз ишке бөгөт коюшкан", — деп билдиришти аталган мекемеден.
Акыркы күндөрү каймак куюлган айнек бөтөлкөнүн ичинен акча, ал эми дары-дармек салынган таңгактан уюлдук аппарат, нандын ортосунан SIM-карта табылган.
Дагы эки "симка" махорка салынган баштыктан алынган. Мындан тышкары, абактагыларды кубантуу үчүн суу же лимонаддын бөтөлкөсүнө ичимдик куюп келгендер болгон.
