БИШКЕК, 10-мар. — Sputnik. Испанияда 10-класста окуган небереси чоң атасынын жыйнаган 10 миң евросун классташтарына таратып жиберди. Бул туурасында РИА Новости Daily Mail басылмасына шилтеме берип жазды.
Окуя Барселона провинциясындагы Кальдес-де-Монтбуи шаарында болгон. Түшкү тамак учурунда 10-класстын окуучуларынын дээрлик бардыгы 100 евролук акчаларды кармап жүргөнүн мугалимдер байкап калышкан. Балдар бир ооздон акчаны классташы бергендигин айтып, ал эми "берешен" окуучу мунусун мойнуна алган.
Бул окуядан кийин мугалимдер WhatsApp каналында чат түзүп, балдардын ата-энелерин үйүнө көтөрүп барган 100 евролорду кайра кайтарып берүүгө чакырган.
"Өтүнүч, эгерде уулуңуз же кызыңызда акча пайда болсо, мектеп администрациясы менен дароо байланышыңыз. 10 миң долларды ээсине кайтарып берүү керек. Бардыгыңыздарды буга түшүнүү менен мамиле кылат деп ишенебиз. Бул тамаша эмес", — деп жазылган чатта.
Чуулгандуу берешендик туурасында жергиликтүү радио да маалымдап, акчаны кайтаруу жарыясын алар да берген. Мындай окуя болгондугун баланын ата-энеси да тастыктады.
Жыйынтыгында тарап кеткен акчалардын басымдуусу кайра топтолгон, бирок балдар чаптагыч менен таттууга жумшаган бөлүгүн, албетте, кайтарган эмес.
