Ош, 7-мар. — Sputnik. Ош шаарынын мэриясы Аялдардын эл аралык күнүнө карата уюштурган майрамдык салтанатта калаа башчысы Айтмамат Кадырбаев энелерге 1000ге жакын элечек, кыз-келиндерге кептакыяларды белекке берди.
Шаар мэри бардык айымдарды майрамы менен куттуктап, аялзат үй-бүлөнүн, жалпы адамзатынын куту, өмүрдүн булагы экендигин белгиледи.
"Бул күн дүйнөдөгү эң кымбат, эң назик энелерге гана таандык. Эне деген ыйык сөзгө таазим этүү менен асылзат айымдарды, апалар, эжелер, карындаштарды Ош шаарынын мэриясынын жана жеке өзүмдүн атымдан чын дилимден куттуктайм", — деди калаа башчысы.
Майрамдык салтанатта Кадырбаев өлкөнүн социалдык-экономикалык өнүгүүсүнө жана шаардын коомдук-саясий турмушуна активдүү катышкан бир нече аялдарга мэриянын Ардак грамоталары менен баалуу белектерин тапшырды.
Чет өлкөдө Кыргызстандын, шаардын намысын коргогон мыкты спортчулардын, студенттердин, окуучулардын жана шаардын өнүгүүсүнө чоң салым кошкон инсандардын апаларына "Үлгүлүү эне" наамдары ыйгарылды.
