БИШКЕК, 6-мар. — Sputnik. Кыргызстандык сууда сүзүүчүлөр Германиядагы эл аралык турнирде байгелүү кайтышты. Бул тууралуу Жаштар иши, дене тарбия жана спорт мамлекеттик агенттиги билдирди.
Маалыматка ылайык, Берлин шаарында 3-марттан 5-мартка чейин өткөн "International Swimming Meeting" эл аралык турниринде кыргызстандык сууда сүзүүчүлөр тогуз медалга жетишти.
Анда түрдүү аралыкта сүзүү боюнча Денис Петрашов эки алтын, бир күмүш, Кирилл Вайс бир коло жана бир күмүш тагынган. Андан сырткары, Иван Пантелеев бир алтын менен бир колого жетишсе, Темирлан Каратаев үчүнчү жана Азиз Сансызбаев экинчи орунга илинген.
Жалпы аталган мелдеште дүйнөнүн 25 өлкөсүнүн спортчулары ат салышкан.
