БИШКЕК, 27-фев. — Sputnik. Ичеги-карынынан жабыр тартып, россиялык ооруканада операция жасоого муктаж болгон үч жаштагы Айназик Турдалиева эртең кечинде Москва шаарына учуп кетээрин наристенин дарыгери Агзам Данияров Sputnik Кыргызстан агенттигине билдирди.
Анын айтымында, наристенин акыбалы туруктуу, бирок оор. Азыр акыл-эсинде, сүйлөп, тамактанып жатат.
"Айназикти апасы менен биздин реаниматологубуз коштоп барат. Анткени жолдо карата кызга жардам керек болуп калышы ыктымал. Ал жактан дароо профессор Алексей Смирновдун клиникасынын кызматкерлери тосуп алышат. Алгачкы күндөрү тиешелүү анализдерди алып, текшерүүдөн өткөрүшөт. Ошондон кийин гана операциянын күнү аныкталат", — деди дарыгер.
Эске салсак, өткөн жумада үч жашар Айназикке Москва шаарындагы профессор Алексей Смирновдун клиникасында операция жасатуу зарылдыгы айтылып, ага 600 миң сом чогултуу боюнча кайрымдуулук акциясы жүргүзүлгөн.
Бактыга жараша, ошол эле күнү кечке маал зарыл болгон каражат 150 миң сомго ашыгы менен чогулуп калган.
