Кыргызстан мусулмандарынын дин башкармалыгынын Аалымдар кеңешинин өкүлдөрү Россиянын Сургут шаарындагы мекендештер жана ал жактын муфтийи менен жолугушту. Бул тууралуу аталган мекеменин маалымат кызматынын башчысы Максат Атабаев Sputnik Кыргызстан агенттигине билдирди.
Билдирүүгө ылайык, аалымдар дин Башкармалыгынын Россия, Урал, Сибирь жана Ыраакы Чыгыш аймактары боюнча өкүлү Сүйүнбек ажы Жусубалиевдин чакыруусу менен барышкан.
"Аалымдар Кеңешинин төрөгасы Абдышүкүр ажы Нарматов жана Аалымдар Кеңешинин мүчөсү Чубак ажы Жалилов барары менен Сургут шаарынын муфтийи менен жолугушуп, эки тараптуу кызматташуу тууралуу пикир алышты. Андан соң дин ишмерлери ал жактагы мекендештер менен кезигип, алардын суроолоруна жооп беришти", — деди Атабаев.
Анын айтымында, аалымдар Сургут шаарынан кийин Нижневартовск жана Ханты-Мансийск шаарларына барышат.
