Маркетологдордун берген маалыматына ылайык кыргыз режиссерлорунун колунан жаралган "Салам, Нью Йорк!", "Бир тууганчик", "Курманжан Датка" сыяктуу тасмалар бир жылга чукул кинотеатрлардын экранынан түшпөй, эл абдан көп келген.
Sputnik Кыргызстан агенттиги 2016-жылы борбор калаанын кинотеатрларында узак убакыт экрандан түшпөй көрсөтүлгөн 10 тасманы назарыңыздарга сунуштайт.
1. "Бажарики" тасмасы, режиссеру Амантур Ормуков. Комедия
2016-жылдын октябрь айында көрүүчүлөрдүн сынына коюлган тасма азыркыга чейин кинотеатрларда популярдуу. Тасмада Дамир аттуу кишинин алты кызы болуп, алар өлкөнүн ар кайсы облустарына турмушка чыгышат. Атасынын мааракесине чогулган бажалар ортосундагы пикир келишпестик тасмада тамаша иретинде чагылдырылган.
2. "План Б" тасмасы, режиссеру Бакыт Осмонканов. Комедия
Аталган тасма көрүүчүлөргө беш ай бою сунушталган. Фильмдин сюжетинде банкрот болуунун алдында турган эки ишкер тууралуу баяндалып, алар ишкерлигин улантуу максатында жасалма үй-бүлө курушат. Тасмада достук, үй-бүлөлүк баалуулук негизги идея катары берилген.
3. "Мегатой" тасмасы, режиссеру Сүйүн Откеев. Комедия
Толук метраждуу бул тасма жай айы бою төрт айдан ашык көрөрмандардын назарына сунушталган. Сюжетте режиссердун тааныштарынын чыныгы жашоодо болгон ар түрдүү кырдаалдары тууралуу баяндалат.
4. "Шаардык келин Шарапат" тасмасы, режиссеру Ырыс Жоомартова. Комедия
Аталган тасма кинотеатрларга ноябрь айында коюлуп азыркы учурга чейин көрсөтүлүп жатат. Фильмде шаардык Шарлотта аттуу кыздын айылга келин болушу, ар кандай күлкүлүү окуялар чагылдырылган.
5. "Движение кылыш керек" тасмасы, режиссеру Аскат Табалдиев. Комедия
Кинотеатрларда эки айдан ашыгыраак көрсөтүлгөн. Тасмада жашоосуна нааразы болгон, бирок аны өзгөртүүгө эч кандай аракет көрбөгөн адам тууралуу баяндалат.
6. "Атанын керээзи" тасмасы, режиссерлору Бакыт Мукул, Дастан Жапар уулу
Эл аралык кинофестивалдарга катышып, алдыңкы орундарды алып келе жаткан тасма кинотеатрларда эки айдан ашыгыраак убакыт көрсөтүлгөн. Тасманын негизги сюжети Америкада жашап жаткан Азат аттуу бала атасынын керээзи менен анын сөөгүн Кыргызстанга алып келет. Карыздарынан кутулуп, туугандары, достору менен жолугуп, жергиликтүү окуялардын күбөсү болот. Улам барган сайын Ата Журттун топурагы кымбат экенин сезип, Америкага кетер-кетпесин билбей арсар ойго батат.
7. "Үркүн" тасмасы, режиссеру Медин Учкеев
Бул тасма көрүүчүлөргө эки айга чейин сунушталган. Тасмада 1916-жылдагы Үркүн окуясын чагылдырылат.
8. "Сагын" тасмасы, режиссеру Данияр Абдыкеримов. Драма
Кинотеатрларда бир ай турган. Тасмада Сагын аттуу жигиттин окуясы баяндалат.
9. "Сюрприз" тасмасы, режиссеру Нурлан Мамакеев. Комедия
Бул тасма да кинотеатрларда бир айга чейин турган. Тасманын сюжетинде Ош шаарынан Караколго бара жаткан эки адам жана алардын жолдогу окуясы чагылдырылган.
10. "Бир мешок акча" тасмасы, режиссеру Кубанычбек Курманбеков. Комедия
Аталган тасма да кинотеатрларда аз убакыт гана коюлган. Анын сюжетинде кафеде ашпозчу болуп иштеген балдар бир мешок акча таап алышат. Сюжет ошол бир мешок акчанын айланасында уланат.
