БИШКЕК, 20-фев. — Sputnik. Көктөм майрамы болгон Ноорузду Казакстандын Павлодар облусунун акими Булат Бакауов апрель айына жылдырууну демилгелеп жатканын Sputnik Казакстан билдирет.
Мындай демилгени былтыртан баштап эле көтөрүп жаткандыгын Булат Бакауов эл менен жолугуп жатып айтты.
"Былтыр интеллигенция өкүлдөрү менен жолукканда Ноорузду майрамдоону апрель айына жылдырууну сунуштагам. Анткени биздин аймакта 22-мартта жер тоң болуп, кыш кете элек болот”, — деди Бакауов.
Облус башчысы бул демилге азыр болгону сунушталып гана жатканын баса белгилеп, эгер кабыл алынса, апрель айына даярдык иштерин баштай турганын айтты.
Нооруз майрамы коңшу Казакстанда 22-мартта белгиленип, эс алуу күндөрү менен коштолот. Быйыл майрам 19-23-март күндөрүнө белгиленген.
Павлодар облусу Казакстандын түндүк-чыгышында жайгашкан. Климаты катаал келип, кыш мезгили беш айдан ашык созулат.
