БИШКЕК, 18-фев. — Sputnik. Мамлекеттик салык кызматы 2016-жылы аткарган ишинин жыйынтыгы жана 2017-жылдагы милдеттери тууралуу коллегиялык жыйын болду. Бул тууралуу өкмөттүн маалымат кызматы билдирди.
Жыйынга биринчи вице-премьер Мухамметкалый Абулгазиев да катышып, салык кызматынын аймактык түзүмдөрүнүн ишин өркүндөтүү зарылдыгын баса белгиледи.
"Салык кызматынын түзүмүндө ири салык төлөөчүлөр менен иш алып барган эки атайы башкармалык бар. Аталган башкармалыктын функционалдык милдетин кайрадан карап чыгуу керек, мында район аймагында иштеген ар бир ишкананын иши жөнүндө толук маалыматка ээ болгон жер-жерлердеги салык инспекторлору иш алып баруусу зарыл. Буга катар Салык кызматынын аймактык башкармалыктары керек учурда ишин жаңы баштоочу ишкерлерге көмөк көрсөтүүсү абзел. Анткени, мамлекет кичи жана орто бизнести өнүктүрүүгө кызыкдар", — деди ал.
Ошол эле учурда салык кызматкерлеринин кесиппкөйлүгүн жогорулатуу боюнча ишти күчтөндүрүү керектигин, салык кызматынын аймактык түзүмдөрүнүн ишин өркүндөтүү зарылдыгын баса белгиледи.
