"Тумар" шоуга катышар-катышпасы февраль айынын аягында белгилүү болот. Ага чейин Sputnik Кыргызстан агенттиги бийчилердин жашаган жерине барып, жашоо-шартын көрүп, жүрөк өйүтөн көйгөйлөрүн угуп келди.
Жакында эле теле алып баруучу Ассоль Молдокматова бийчилерге жаңы коляска алып берүү демилгесин көтөрүп чыккан. Биз барып көргөнүбүздө чындыгында эле Адина менен Эрдиктин коляскалары эскилиги жетип, көп жеринен "жамаачы" болуп калыптыр. Тилекке каршы, бийчилердин бири Талгат Бишкектин сыртында жашагандыктан, шарты болбой биз менен жолугушууга келе алган жок.
Топтун мүчөсү Эрдик эскилиги жеткен коляскасы улам-улам сынып, кечээ күнү эле ширетүүчүгө барып оңдоттуруп келгенин айтты.
"Коляскам жедеп эскирип, улам бир жеринен сынып жатат. Кечээ унаа оңдоочу жайдагы ширетүүчүгө чаптатып келдим. Алар да кээде жасап берсе, кээде жасабай коюшат", — деди бийчи.
Ал эми Адина каражат чогулса сатып алынчу жаңы коляскалардын артыкчылыгын айтып берди.
"Алайын деп жаткан коляскалардын салмагы жеңил, атайын бийлегенге ыңгайлашкан. Каалагандай кыймылдарды жасаса болот. Ал эми биздин азыркыларыбыз кадимки эле ооруканада оорулууларды ары-бери сүйрөй турган коляскалар. Биз буларды күчкө салып эле бийлеп жатабыз. Бир жолу чет өлкөдө сынак болор күндүн алдында сынып калып, уюштуруучулар өздөрү оңдотуп беришкен", — деди Адина.
Учурда жаңы коляскага каражат топтоо максатында банкта эсеп ачылган. Адинанын айтымында, ага акырындык менен каражат түшө баштады.
Анткен менен тоскоолдуктарга карабай бийчилердин маанайы жакшы. "America's got Talent шоусунун кастингинен өтүп кетсек" дегенде эки көзү төрт болуп, уюштуруучулардын жообун күн санап күтүп жаткан чактары.
