БИШКЕК, 15-фев. — Sputnik. АКШнын Техас штатында жашаган үй-бүлө үйүнө чоң бизонду киргизип алып, багып жатат. Бул туурасында РИА Новости Inside Magazine журналына шилтеме кылып билдирди.
60 жаштагы Ронни Бриджес менен анын 44 жаштагы аялы Шеррон бизонду "жапайы жаныбар" деп атап алышкан, анысы 11 жашта. Алар журналисттерге бул жаныбарды абдан жакшы көрүшөрүн, бизондун ал тургай жата турган жайы бар экендигин айтып беришкен.
"Ал — биздин үйдүн жаныбары. Көчөдө жүргөндө тынчы жок, үйдөн кадимки эле жентльмен", — деп айткан ал.
"Жапайы жаныбар" азыр бир тоннага жакын салмак басат. Ал кожоюндары жана үйдөгү ит менен кошо тамактанып, эшиктен араң кирип-чыгат.
Бриджес журналисттерге тамаша-чыны аралаш убактысынын көбүн аялына караганда бизон менен өткөрө тургандыгын айткан.
"Мени жакшы тааныбагандар акылынан айнып калган дешет. Ал эми мага жакын жүргөндөр акылымдан чын эле айныганымды билишет", — деген ал тамашалап.
Азырынча бизон айланасындагыларга чуу чыгарган деңгээлге жеткен кооптуулук жарата элек.
