БИШКЕК, 14-фев. — Sputnik. Россияда унутчаактыкка каршы биринчи дары ойлоп табылганын РИА Новости агенттиги "Известия" гезитине шилтеме берүү менен билдирди.
Дарыга клиникалык сыноолор жүргүзүлүп 2020-жылдан кийин сатыкка чыгышы мүмкүндүгүн Россиянын илимдер академиясынын биоорганикалык химия институтунун директор орун басары Александр Габибов билдирди.
Аталган дары эс тутуму начарлаган кишилерди кайтадан коомго кайтарууда активдүү роль ойнорун адистер белгилешүүдө.
"Аутоиммундук дарттар онкологиялык ооруга абдан окшош. Аларды айыктыруу оор, айрым учурларда эч мүмкүн эмес. Анын ичинде нейродегенаративдик унутчаак оорусу да бар. Ал өөрчүп кеткенде бейтаптын денеси өз белокторунан аутоантитела иштеп чыгат", — дейт Габибов.
Учурда дарынын клиникалык биринчи сыноолору аяктады. Аны Россиянын илимдер академиясы бир нече медициналык мекемелер менен биргеликте өткөрүүдө.
