БИШКЕК, 10-фев. — Sputnik. Кечээ, 9-февраль күнү, жыйынтыкталган Индиядагы эл аралык кинофестивалга Кыргызстандын атынан катышкан "Ата керээзи" тасмасы негизги сынакта баш байгеге ээ болду. Бул тууралуу белгилүү кинотаануучу Гүлбара Төлөмүшова билдирди.
Иш-чара Бангалор шаарында 2-февралда башталып, ага жалпы жонунан 50 өлкөдөн 180ден ашуун тасма катышкан.
"Бакыт Мукул менен Дастан Жапар уулунун "Ата керээзи" тасмасы 20га чукул фильм менен "Азия киносу" сынагында ат салышты. Негизи Индия кино тармагы мыкты өнүккөн ири держава болуп саналат. Андыктан кыргызстандык тасманын баш байгелүү болушу биз үчүн чоң сыймык", — деди Төлөмүшова.
Белгилей кетсек, быйыл тогузунчу ирет өтүп жаткан Бангалор кинофестивалынын калыстар тобуна кыргызстандык режиссер Дальмира Тилепбергенова да кирген.
