БИШКЕК, 9-фев. — Sputnik. Бириккен Улуттар Уюмундагы Кыргызстандын туруктуу өкүлү Миргүл Молдоисаева БУУнун башкы катчысы Антониу Гутерреш менен жолукканын КРдин Тышкы иштер министрлиги билдирди.
Жолугушууда тараптар уюм менен Кыргызстандын кызматташуусунун учурдагы абалы жана келечеги тууралуу пикир алышкан.
Ал эми Гутерреш Кыргызстан өз аймагындагы парламенттик башкаруудагы жалгыз өлкө экенин айтып, демократия тармагында бир катар ийгиликтерге жеткенин баса белгиледи. Андан сырткары, Кыргызстан Бириккен Улуттар Уюмунун маанилүү өнөктөшү экенин кошумчалап, мындан аркы кызматташуу жемиштүү болоруна ишеними чоң экенин айтты.
Гутерреш Кыргызстанга БУУнун качкындар иши боюнча Жогорку комиссары катары бир нече жолу келгенин белгилеп, кыргыз элинин меймандостугуна токтолду.
