БИШКЕК, 8-фев. — Sputnik. Жаштарды экстремисттик агымдардан оолак кылуу максатында өлкөнүн түштүк аймагындагы облустарда жайгашкан медреселерде кесиптик билим бериле баштады. Бул тууралуу Sputnik Кыргызстан агенттигинин аймактык кабарчысына "АВЕП" коомдук фондунун өкүлү Нурланбек Токонов билдирди.
Анын айтымында, кошумча кесип үйрөтүү долбоору январь айынан тарта ишке киргизилген.
"Долбоордун алкагында 200 бала кабыл алынат. Алар ширетүүчүлүк, ашпозчулук, тигүүчүлүк кесиптерине ээ болуу үчүн эки жылдык окуудан өтөт", — деди Токонов.
Ал ошондой эле медреседе окуган жаштар бир гана диний багытта билим алып чектелгендиктен, экстремисттик агымдарга кошулуп кетүү мүмкүнчүлүгү жогору экенин айтып, кесиптик билимдин маанилүүлүгүн кошумчалады.
"Долбоор аяктагандан кийин медреселер кесиптик билим берүүнү акы алуу жолу менен улантып кетишсе болот", — деди фонддун өкүлү.
Белгилей кетсек, Ош, Баткен, Жалал Абад облустарындагы 30 медреседе жалпы 2800 студент билим алып келет.
