Чогулгандар быйыл кыш суук болуп, өкмөт белгилеп берген лимит жетпей жатканын айтышты. Алар 2000 кВт саат электр энергияны 77 тыйындан берүүнү талап кылышты. Шаардын тургуну Кенжекан Сатыбалдиева эл көчөгө аргасыздан чыкканын айтты.
"Быйыл Нарында кыш болуп көрбөгөндөй суук болду. Эл өкмөт бекитип берген лимиттен ашык колдонду. Көмүрү жок болсо анан кантет? Электр энергиясы үчүн чыгып келген акчаны бардыгы эле төлөй албайт. Иши барлар төлөшү мүмкүн. Ал эми карапайым калк кантип төлөйт?" — деп суроо салды ал.
Нааразы болгондор Нарын шаарында 10 миң абоненттин үч миңи 1000 саат лимиттен ашык электр энергиясын пайдаланышканын билдиришти.
Аларды өкмөттүн Нарын облусундагы өкүлү Аманбай Кайыпов кабыл алып, сунуштарын жана көйгөйлөрүн уккан. Эгер алардын талаптары аткарылбаса мөөнөтсүз митингге чыга турганын билдиришти.
