БИШКЕК, 5-фев. — Sputnik. Электроника буюмдары сатылган дүкөндүн сатуучусу кадимки соодагерден айырмаланып, флешка, мышка, клавиатура дүйнөсүнө эшик ачкан адам десек болот. Sputnik Кыргызстан агенттиги бул сатуучулардын кыжырын кайнаткан нерселер тууралуу билип көрдү. Албетте, сатуучунун аты аталбайт.
1. Товарды жакшылап көрөт элем, таңгагын ачыңызчы деген адамдар таң калтырат. Эми чаң соргуч болсо бир жөн, аны карамак тургай, иштетип да көрүү зарыл. Батарейканын сиз көрө элек эмнеси бар, айтсаңыз.
2. Дүкөндүн кожоюнунун товарды кайтарып берүүгө же алмаштырууга тыюу салганы. Товардын кандай сапатта экенин аны сатып жаткан мен билем да! Телевизоруна төп келбеген же кнопкалары жакшы иштебеген пультту сатып алган адамдын абалын элестеткиле…
3. Сүйлөшкөн кызыңызга гүл бериңиз, киного чакырыңыз, жакшынакай экенин айтып, жылуу-жумшак сөзүңүз менен көңүлүн көтөрүңүз. Бирок эч качан, угуп атасызбы, эч качан батарейка тандатпаңыз!
4. Сатуучунун көзүнчө товарга болгон нааразычылыгын айтып наалыгандар. Ооба, колуңузга алган наушниктер анчейин болушу толук мүмкүн, бирок анын эмнесин мага айтып атасыз, аларды мен жасадым беле. Балким мен деле ошол учурда алдымда селпейген бирөө эмес, келишимдүү жигиттин турушун каалап жаткандырмын. Унчукпай эле турам го…
5. Бир сом үчүн өлүп кете жаздагандар. Буга чейин адамдар ушундай майдачыл болорун билбептирмин. Андан сер-сөөлөтүн кантейин!..
