БИШКЕК, 5-фев. — Sputnik. Кыргызстандык өндүрүшчүлөр өткөн жылдын 11 айында Евробиримдикке кирген өлкөлөргө 68 миллион долларлык товар экспорттогон. Бул туурасында өкмөттүн маалымат кызматы билдирди.
Кыргызстан жалпылаштырылган артыкчылык тутумуна бир жыл мурда ээ болгон. Анын негизинде Евробиримдикке кирген өлкөлөргө бажы салыктарысыз 6 миң даана товар экспорттоого болот. Бул маселе Жогорку Кеңештин жыйынында дагы көтөрүлүп мүмкүнчүлүктү натыйжалуу колдонуу айтылган.
"2016-жылдын 11 айлык жыйынтыгында өлкөдөгү 50 мекеме 68 миллион долларлык товар экспорттогон. Экономика министрлигинин маалыматы боюнча анын 30 пайызы төө бурчак, 23 пайызы этно кийимдер, 9 пайыз козу карын жана мумия, бал, жаңгак, кургатылган жемиштер экспорттолгон" — деп айтылат маалыматта.
Ошондой эле билдирүүдө азыркы учурда кыргыз өкмөтү Евробиримдиктин өкүлдөрү менен биргеликте аталган уюмдун рыногуна ата мекендик товарларды жеткирүү боюнча жол карталарды түзүп жатканы айтылат.
