БИШКЕК, 4-фев. — Sputnik. Бишкек ШИИБи Жогорку Кеңештин депутаты Дастан Бекешевге жалган жалаа жабууга аракет жасаган азиздер коомунун мүчөсүнө карата иш козгоду. Бул тууралуу шаардык милициядан билдиришти.
Буга чейин азиздер жана дүлөйлөр коомунун социалдык бөлүмүн мурдагы башчысы Темирлан Ормуков депутат Дастан Бекешев коррупциялык иштерге барды деп арыз менен милицияга кайрылган. Эл өкүлү өз кезегинде ага жалаа жапкан билдирүү боюнча чара көрүү өтүнүчү менен милицияга арыз жазган.
"Учурда Кылмыш жаза кодексинин 329-беренеси (кылмыш жасады деп жалган билдирүү таратуу) боюнча кылмыш иши козголуп, тергөө амалдары башталды", — деп айтылат маалыматта.
Ормуков Бекешевди оң рулдуу машиналарды саткан жеке ишкерлерден ири көлөмдө акча алып, алардын кызыкчылыгын парламентте коргоду деген айып койгон.
Тергөөнүн жыйынтыгында Ормуковдун айткандары далилденген эмес.
