Кызматкерлердин айлык маянасынан бир миллион сомду өзүнө мыйзамсыз ыйгарып алгандыгы үчүн алты жылга соттолгон бала бакча жетекчиси кызматына кайрадан келүү үчүн Ош шаардык билим берүү башкармалыгын сотко берди. Бул тууралуу башкармалыктын юристи Абдували Момунов билдирди.
Анын айтымында, Ош шаарындагы №62 "Каныкей" бала бакчасынын сот жообуна тартылган мурунку жетекчиси Бурул Көбөнова кайрадан директор болууга аракет кылууда.
"Эсептөө палатасынын кызматкерлери 2014-жылы текшерүү жүргүзүп, аталган директор бала бакчада иштеген кызматкерлерге эмгек өргүү үчүн берилчү каражаттан 10 миң сомдон өзүнө ыйгарып алгандыгын аныктап чыккан. Жалпы жонунан бир миллион сомду өзүнө мыйзамсыз ыйгарып алгандыгы үчүн Ош шаардык соту тарабынан алты жылга соттолуп, кызматынан алынган", — деди юрист Абдували Момунов.
Ал белгилегендей, Көбөнова кайрадан кызматына келүү үчүн шаардык билим берүү башкармалыгынын үстүнөн арыз жазып Ош шаардык сотуна кайрылган.
Бурул Көбөнова 2010-жылы бала бакчага директор болуп дайындалган.
