БИШКЕК, 31-янв. — Sputnik. Алай районунун Ош — Гүлчө — Дароот-Коргон авто жолунун 187-чакырымында жол кырсыктан каза болду делген Кадамжай районунун тургуну Майрамбек Нажинов киши колдуу болгонун соттук-медициналык экспертиза көрсөттү. Бул тууралуу аймактык кабарчыга маркумдун жакындарынын адвокаты Болот Баетов билдирди.
Эске салсак, узаган жылдын 21-сентябрында Mersedes-Benz үлгүсүндөгү унаа Сары-Могол айылынан Сары-Таш айылына бара жатып жолдун түштүк тарабындагы тосмону сүзүп кырсыкка кабылган. Натыйжада унаанын алдыңкы отургучунда отурган Майрамбек Нажинов алган жараатынан улам окуя болгон жерде каза болгон. Маркумдун жакындары иш Алай РИИБи тарабынан акыйкат караларынан күмөн санап, Ош ОИИБге кайрылышкан. Алар Нажинов киши колдуу болушу мүмкүн экенин айтышкан.
"Маркумдун туугандарынын өтүнүчү менен каза болгон жарандын сөөгү эксгумация болуп, кайрадан экспертиза дайындалган. Натыйжада соттук-медициналык экспертиза жаран автокырсыктан эмес сабалып өлгөн деген корутунду чыгарды", — деп билдирди адвокат Баетов.
"Соттук-медициналык экспертиза жаран киши колдуу болгонун көрсөткөндүктөн ага ылайык тергөө иштери башталды. Учурда жаранды өлтүрүүгө шектелип Алай районунун А.А. аттуу жашоочусу кармалып убактылуу кармоочу жайга киргизилди. Кырсыкка кабылган унаанын айдоочусу дагы камакта", — деп билдирди Ашырбев.
Анын айтымында, аталган факты боюнча Кылмыш жаза кодексинин 104-беренеси (саламаттыкка билип туруп зыян келтирүү) боюнча кылмыш иши козголду.
