Алимжан Байгазаков: Ошко жөө адамдар өтүүчү асма көпүрө куруу керек
Ош шаарындагы унаа тыгыны көп катталган көчөлөргө жөө адамдар өтүүчү асма көпүрөлөрдү куруу боюнча долбоорду шаардык кеңештин депутаты Алимжан Байгазаков демилгелеп чыкты. Бул туурасында Sputnik Кыргызстан агенттигине депутат өзү билдирди.
Депутаттын айтымында, эгер долбоор ишке аша турган болсо шаардагы унаа тыгындар 70-80 пайызга кыскарат.
"Өтмөктү жер алдынан курабыз десек, бир топ эле кымбат түшүп калат экен. Эгер асма көпүрө кура турган болсок болжол менен 15-20 миллион сом керектелет. Учурда унаа тыгыны көп катталган Масалиев — Навои жана Курманжан датка — Айтиев көчөлөрүнүн кесилишине көпүрө куруу сунушун карап чыгып мэрияга жибердик" — деди Байгазаков.
Ошондой эле депутат көпүрө курууга кеткен каражатты шаардык бюджеттен алууга мүмкүнчүлүк бар экенин белгиледи.
