БИШКЕК, 29-янв. — Sputnik. Бишкектеги Токтогул жана Шопоков көчөлөрүнүн кесилишинде эки унаа сүзүшүп, унаалардын бири тоголонуп кетти. Бул тууралуу күбө кабарлады.
Анын айтымында, жол кырсыгы 28-январь күнү кечки саат 22:00дөр чамасында катталган. Анда Honda Fit (такси) жана Honda Stepwagon үлгүсүндөгү унаалар кагышып, экинчи унаа тоголонуп кеткен. Окуя болгон жерге эки тез жардам унаасы жана Бишкек ШИИБдин Кайгуул милиция башкармалыгынын кызматкерлери келишкен.
"Honda Stepwagon үлгүсүндөгү унаада атасы, апасы жана эки бала менен төрт адам болгон. Алардын баары ооруканага жаткырылды. Ал эми Honda Fit үлгүсүндөгү унаада эки адам болгон. Жүргүнчү ооруканага жеткирилсе, таксинин айдоочусу эч кандай жаракат алган эмес, коркуп калган", — деди Кайгуул милиция кызматкерлери.
Маалым болгондой, жабырлануучулардын биринин абалы оор. Жол кырсыгынын келип чыгуу себеби териштирилүүдө.
