БИШКЕК, 18-янв. — Sputnik. Авиакырсыктан жабыркаган төрт үй-бүлө учурда Бишкек шаарындагы "Семетей" мейманканасында жашап жатат. Бул тууралуу ӨКМ билдирди.
Эскерте кетсек, 16-январь күнү Гонконгдон Стамбулду көздөй келе жатып, Бишкекке май куюу үчүн токтомок болгон учак "Манас" аэропортунун жанындагы Дача айылына кулап түшкөн. Андан 38 адам каза болуп, 23 үй жараксыз абалга келген.
Өкмөт баш паанексиз калган адамдарды убактылуу "Семетей" мейманканасына жайгаштыруу чечимин кабыл алган.
"Мейманканада учурда 20 кишиден турган төрт үй-бүлө жашап жатат. Анын 9у — чоң кишилер болсо, 11и — балдар. Баары тең тамак-аш, керектүү нерселер менен камсыз болгон", — деп айтылат маалыматта.
Мындан тышкары, Саламаттык сактоо министрлиги кырсыктан ар кандай жаракат алган 13 киши ушу тапта ооруканада дарыланып жатканын билдирди.
