БИШКЕК, 18-янв. — Sputnik. КВНдин жогорку лигасынын алкагында кыргызстандык "Азия MIX" командасы коштошуучу номерин тартуулайт. Бул тууралуу Sputnik Кыргызстан агенттигинин кабарчысына команданын мүчөсү Марат Жуманалиев (Маратик) билдирди.
Кыргызстандык топтун коштошуу программасы 19-январда Сочинин кышкы театрында өтө турган "КиВиН-2017" эл аралык 28-фестивалында тартууланат.
Сочидеги "КиВиН-2017" эл аралык фестивалы 23-январга чейин созулат. Тандоо фестивалынын алкагында КВН жогорку лигасынын жаңы курамы түзүлөт.
"Эртең акыркы жолу өнөрүбүздү тартуулайбыз. Мындайча айтканда чемпиондор коштошот. Эми биз КВНдин жогорку лигасында ойнобойбуз", — деди Жуманалиев.
Ал келечекте жайкы кубокторго, КиВиН жана КВН фестивалдарына катышып калуулары мүмкүн экенин белгиледи.
